Bernhard Schaal zum siebzigsten Geburtstag

Deeg i a da Sechzger zruck,
morgads seine mir dô hoa,
`s Taxi Heidi kommt- dô gugg,
so war i et môl aloa!

Ond sui frôgat- `s ischt halb achte-
"Soll i gschwend no mit Dir nae?"
A i wo- i duar ganz sachte,
was keed denn ao schlemm jetzt sae?

Doch d’r Schlüssel steckt vo enna,
koi Problem i gang zom Keller,
doch Du wuscht ma Frau et kenna-
weil ao dô war dui haet schneller!

Ond so lieg e’s Auto i,
will a Kapp vool Schlôf mir gönna,
vo d’r Kuche sieht se mi,
will mi aber no noet henna…!

Steig zo guader Letzt – aus Gnade-
nôch zom Kuchefeaster nae-
`s schöne Fescht ischt jetzt rom – schade-
`s hätt et schöner könna sae!

"Schafa wett i mit ehm et",
-so sae Hilde zua mir saet…!
Wiaviel Wissa i et hätt,
jedesmôl isch doch a Fraed!

Viel Humor und Gottes Seaga,
Kirschabeem- et ganz so hao-
Schao môl bischt dô honna gleaga,
dass di’s geit- mir seine fraoh!

Sicher, boide moinet’s reacht,
oiga seine m’r halt ao-
aber maeschdens wudd’s et schleacht,
was mir mache, kô ma währle sprenga lao.

D’r Hausôschluss ischt hee ond rennt
ond der Bernhard greift jetzt ô,
ond er saet: "Läut Du ao gschwend,
sag, dass ma uff’s Klo et kô."

Ond i duar wia ma mir’s saet,
aber `s machet neamerd uff,
Ond d’r Bernhard hôt a Fraed,
Schafft am Boga, ischt guat druff.

Aber plötzlich haerscht ehn fluacha,
uff sae Arbat hôt oar gschissa,
der soll bloß schnell `s Weite suacha,
ond der Bernhard kämpft verbissa.

Ao was ôstrengt, kô ma doila,
ond ao dô gôhscht vannadraus,
mancha Ärger kô dees hoila,
ob Staub, ob Lärm, `s macht Dir nix aus!

Fir so ebber duat ma schao
Ao als "Jonger" ebbes mae,
so Leut sott’s viel weiter hao,
`s Leaba keed viel besser sae!

Ao als Sänger stets a Bank,
ond d‘ Sabine sengt jetzt ao,
Schaal’sche Stemma- Gott sei Dank-
grad a boide sei m’r fraoh!

Was I halt so herzig fend:
"No oimôl" , so fleht d’r Baba,
ond grad dupfagleich saet’s Kend,
"No oimôl, nôch kô’s voll klappa!"

Vielmôl soll der Satz no komma,
wia vom Vadd’r so vo’r Jonga,
maeschdens haone’s jô vernomma,
sicher hôt’s nôch bald druff klonga.